Auður starfaði með Heimilisiðnaðarfélagi Íslands um skeið ásamt fleiri konum þar á meðal Vigdísi Pálsdóttur handavinnukennara sem hafði eins og Auður lagt stund á nám í handavinnudeild Handíðaskólans. Þær sátu meðal annars saman í ritnefnd ársrits Heimilisiðnaðarfélagsins, Hugur og hönd, en í henni sat Auður árin 1971 til 1984. Í ársritinu birtust eftir Auði margar greinar og prjónauppskriftir. Sjónarhorn hennar var vítt en meðal annars skrifaði hún áhugaverða umfjöllun um Blindrafélagið á 40 ára afmæli þess.

Frá árinu 1966 hefur ársritið komið út og í því birst fjölmargar greinar um handverk, listiðnað, munstur og vinnuteikningar en því var í upphafi ætlað að stuðla að aukinni verkmennt og efla bæði virðingu og áhuga fyrir hérlendu og erlendu handverki. Í félagsskap þeirra sem störfuðu með Heimilisiðnaðarfélaginu var Auður á heimavelli. Frá unga aldri hafði henni lærst að meta hvers kyns handverk og því hafði hún sýnt einlægan áhuga bæði í námi sínu við Handíðaskólann þar sem hún hvatti kennara sinn, Valgerði Briem, til þess að leyfa nemendum að sækja innblástur og uppörvun í munsturteikningu á Þjóðminjasafninu. Áhugi Auðar á sögu íslenskra hannyrða og handverks kemur einnig skýrt fram  í verkum hennar. Árið 2005 birtist í Hug og hendi grein um hannyrðir á Gljúfrasteini eftir Heiði Vigfúsdóttur þar sem rætt er við Auði um helstu verk hennar en um áratug fyrr eða árið 1996 birtist í sama riti grein Guðrúnar Hafsteinsdóttur um Maríuklæðið á Gljúfrasteini, sem saumað er eftir altarisklæði frá Reykjum í Tungusveit og varðveitt á Þjóðminjasafninu. Prjónauppskriftir Auðar ásamt fleiri verkum bera vott um skapandi og frjóan huga hennar.