„Í stundareilífð eina sumarnótt“ - Álfheiður Erla og Valgeir Daði á Gljúfrasteini 

Sópransöngkonan Álfheiður Erla Guðmundsdóttir stundaði söngnám í Söngskóla Sigurðar Demetz og í Hanns Eisler tónlistarháskólanum í Berlín, þaðan sem hún lauk bakkalár- og meistaranámi. Álfheiður þreytti frumraun sína í Staatsoper Berlin árið 2019 í hlutverki Mjallhvítar í óperunni Schneewittchen eftir Wolfgang Mitterer, og hefur síðan þá komið víða fram í óperuhúsum í Evrópu. Álfheiður Erla hlaut Íslensku tónlistarverðlaunin árið 2021 sem söngkona ársins í flokknum Sígild og samtímatónlist og var valin í 16 manna úrslit BBC Cardiff söngkeppninnar sama ár. Álfheiður Erla hefur verið fastráðin við Theater Basel í Sviss frá haustinu 2021. Þar hefur hún farið með ýmis hlutverk, meðal annars í Mattheusarpassíunni eftir Bach, Einstein on the Beach eftir Philip Glass og í Don Carlos eftir Verdi. 

Valgeir Daði Einarsson er menntaður tónlistarkennari frá háskólanum í Potsdam í Þýskalandi. Hann býr nú í Basel þar sem hann starfar sem íþrótta- og tónlistarkennari. Valgeir stundaði nám á rafbassa í Tónskóla Sigursveins áður en hann hélt út til Þýskalands í nám. Valgeir hefur verið virkur í tónlistarlífinu á Íslandi og í Berlín sem gítar- og bassaleikari. Hann leikur reglulega með hljómsveitinni Elkvilla og öðru tónlistarfólki. Undanfarin ár hefur hann sett áherslu á kennslu í hreyfingu og tónlist með börnum og ungmennum.