Tilkynnt var í Stokkhólmi í morgun að handhafi Nóbelsverðlaunanna í bókmenntum árið 2014 yrði franski rithöfundurinn Patrick Modiano. Hann fæddist árið 1945 í París, þar sem fyrsta bók hans kom út árið 1968. Hann hefur síðan sent frá sér fjölda skáldsagna sem þýddar hafa verið á mörgum tungumálum.
Halldór Laxness er eini Íslendingurinn sem hlotið hefur þessi eftirsóttu verðlaun, þó að fleiri Íslendingar hafi verið tilnefndir í gegnum tíðina. Halldór var fyrst tilnefndur árið 1948 og var eftir það tilnefndur á hverju ári þar til hann hlaut verðlaunin árið 1955. Á næsta ári verða 60 ár liðin frá því að Halldór Laxness hlaut verðlaunin.
Bókmenntaverðlaun Nóbels voru fyrst afhent árið 1901 samkvæmt leiðbeiningum sem sænski uppfinningamaðurinn Alfred Nobel lét eftir sig í erfðaskrá sinni en hann lést árið 1896. Þar kvað á um að hin gífurlegu auðæfi sem hann skildi eftir sig ætti að nota til þess að setja á stofn fimm verðlaun. Þessi verðlaun skyldu svo veitt þeim einstaklingum sem skarað hefðu fram úr á sínu sviði í eðlis-, efna-, læknisfræði, bókmenntum og friðarbaráttu. Árið 1969 var hagfræðiverðlaunum sænska seðlabankans í minningu Alfreds Nobel bætt við.
Á vefsíðu Nóbelsverðlaunanna má sjá lista yfir fyrri Nóbelsverðlaunahafa í bókmenntum.